Aurreko asteburuan, martxoaren 29 eta 30ean, Gipuzkoako Kluben arteko Kopa ospatu zen Tolosako Usabal kiroldegian. Bertan gure taldetik Garazi Etxeberria, Iker Gorostegi, Miren Sarobe, Mayi Gorostegi, Irati Etxeberria, Oihan Matute, Mario Amantegi, Ibón Elola, Kimetz de la Cruz, Amaiur Iparragirre, Ane Meyer, Nora Miguelez eta Ander Martínezek hartu zuten parte.
Marka hobekuntza mordoa izan genituen txapelketan zehar:
- Garazi Etxeberria: 50 libre (taldeko absolutu mailako errekorra), 100 bular eta lau estiloetako 100 metroak.
- Iker Gorostegi: lau estiloetako 200 metroak (taldeko absolutu mailako errekorra) eta 200 tximeleta.
- Miren Sarobe: lau estiloetako 100 eta 400 metroak eta 200 tximeleta.
- Mayi Gorostegi: 200 bizkar eta lau estiloetako 400 metroak.
- Oihan Matute: 100 (taldeko 16 urteko errekorra) eta 200 bular (taldeko 16 urteko eta absolutu mailako errekorra) eta lau estiloetako 400 metroak.
- Mario Amantegi: 200 libre, lau estiloetako 100 metroak eta 50 libre.
- Ibón Elola: bizkar erako 50, 100 eta 200 metroak (taldeko 16 urteko errekorra) eta 100 libre.
- Kimetz de la Cruz: 50 eta 100 bizkar eta 200 libre.
- Amaiur Iparragirre: lau estiloetako 200 metroak, 50 tximeleta eta 800 libre.
- Nora Miguelez: 50, 100 eta 200 bular eta 400 libre.
- Ane Meyer: 50, 100 eta 200 libre eta 50 bular.
- Ander Martínez: 50 libre, 50 bular, lau estiloetako 200 metroak eta 200 bular.
Bi egun luze genituen aurretik; larunbat goiza 200 bular probarekin hasi genuen eta albiste onekin gainera, Oihan Matutek taldeko 16 urteko eta absolutu mailako errekorra egin baitzuen (2:34,02). Jarraian 100 libre eta 50 bizkar probak ikusi genituen hobekuntza askorekin. Lau estiloetako 200 metroetako proban ere, hainbat marka hobekuntzaz gain, Iker Gorostegik beste taldeko errekor absolutu bat hautsi zuen (2:14,36). Goizari amaiera emateko, 4x200 libre erreleboak izan genituen, neskek 10. postua eta mutilek 8. postua eskuratu zutelarik.
Arratsaldea lau estiloetako 4x50 metroetako erreleboekin hasi genuen eta kasu honetan, emaitza aldetik podiumetik gertuagoko postuak izan genituen: neskak 5. eta mutilak 4. postuan. Gainera, Garazi Etxeberriak errelebo horretako lehen postan egindako 50 libre proban, beste errekor absolutu berri bat ezarri zuen, 27.45 denborarekin. Ondoren 800 libre, 200 bizkar, 100 bular, 50 tximeleta eta lau estiloetako 100 metroko probak izan genituen hobekuntza nabarmenekin. Aipatzekoa kasu honetan ere, bai Ibon Elolak bizkar erako 200 metrokoan (2:17,82) eta bai Oihan Matutek 100 bular proban (1:11,33) 16 urteko taldeko errekor berriak ezarri zituztela. Arratsaldea mutilen 4x100 libre erreleboekin bukatu genuen, 7 garren postu dotore bat eskuratuz.
Igande goiza 4x50 libre erreleboekin hasi genuen, neskak podiumetik postu batera geratuz eta mutilen 9. postuarekin. Gero, 200 libre, 100 tximeleta, 50 bular, lau estiloetako 400 metroak eta nesken 4x100 libre erreleboetako 9. postu txukuna izan genituen; lan aparta igande goizekoa ere!
Asteburuari amaiera emateko, igande arratsaldean 50 libre, 200 tximeleta, 100 bizkar, 400 libre eta lau estiloetako 4x100 metroetako erreleboak izan genituen, nesken 8. eta mutilen 4. postuekin. Estilo libreko 50 metrokoan, Garazi Etxeberriak asteburuko azken errekorra ezarri zuen, absolutu mailan taldeko marka onena 27,45ean ezarriz.
Asteburu benetan oparoa izan da eta sailkapen postuetan gora eta behera ibili ginen arren, azkenean emakumezkoetan 10. postua eskuratu genuen eta gizonezkoetan berriz, 9. postua. Sailkapen bateratuan aldiz, 8. postuan sailkatuta, benetan pozik bukatu genuen txapelketa.
Apirila iritsita, 3 hilabete eta erdi besterik ez zaizkigu geratzen denboraldia amaitzeko. Indartsu daude gure gazteak eta denboraldi amaiera bikaina izango dugulakoan gaude.
Tamalez, Gipuzkoako Kluben arteko Kopa baja garrantzitsu batekin amaitu genuen, Garazi Etxeberriaren azken jarduna izan baikenuen asteburuan; hainbat eta hainbat urtetan gure taldean maila benetan altuan lehiatzen egon ondoren, igeriketa bigarren plano batean uztea erabaki du Garazik. Asko botako ditugu faltan bere konpromezu, alaitasun eta lehialtasuna. Zorte on ibilbide berrian Garazi!!
Zorionak denoi egindako txapelketagatik!
Iruzkinak
Argitaratu iruzkina